...
هزني، اخطفني، اهرب بية ،تحرك، تكلم ،عيط و صيح، قلي نكرهك، قلي نحبك، قلي ايجاني ولا حتي ابعد علية ، المهم اعمل
حاجة يزيك ما قعدت واقف في وسط الثنية ، لا خليتني بعدك نقدم و نمشي و ننساك و لا مشيت انت و لا حتي خلطت علية،
تو سنين في حيوط قلبي عامل كي مسمار جحا ، لا خذيتوا ليك و لا خليتوا لغيرك ، تجي تتضلل باحضاني و تتوسد صدري و
تحكيل حكاياتك و اخر العشية تلم كلامك و ما غير سلام تمشي و تخليني ...ضايعة بين ذاكرة قوية ما تنساش بالساهل و بين
رغبة في اني نقلعك من عروش قلبي و نرميك بعيد ، بين كلام قلتوا و كلام عمرك لا مش تقولوا ، كل مرة تخليني حايرة بين
حرارة النظرة الي في عينيك كي تجي و برودة اديك كي تمشي ، سعات نحس روحي حافضتك كي كف يدي و سعات نحس
روحي ما نعرفكش ..يزي ما حيرتني لا عاد فاهمتك لا حبيب لا غريب ، لا بعيد و لا قريب ، و معادش فاهمة انا بالنسبة ليك
شنية ،علاش مخليني هكا معلقة بين هوا و فضاء ، لاني فوق السحاب و لا حاطة ساقية في القاع ، ماشي بسياسة لا نحبك
و لا نصبر عليك ، انت لية وانا موش ليك ، تعبتني معاك، حاسبة روحي حرة وانا بيك مقيدة ، رابطني بسلاسلك و طاير بية ،
نغزر لسماك ونتننفس هواك و عايشة ندهدص في حبك ، اما سماك ضيقة تقول تصويرة في كواتروا و هواك يخنق و حبك
معذبني ...
وقتاش ؟
وقتاش تقرر تقدم ولا توخر ، تقعد معايا ولا تذوب و تتبخر، وقداش ؟، قداش شتقعد متحير و بين كل ساعة
و ساعة رايك تغير ..انا ما طالبة منك شي ، نحبك تفهم روحك و تفهمني ..ما نحب نسمع منك كان حاجتين قلي يا معايا
شتعيش يا مني تخرج و ما ترجعليش ، انا تعبت مالمستنية و كرهت حاجة اسمها حب عزيز و كيما قالوا ناس بكري
"الي يناديك ناديه بالصوت حتي يواجب و الي يخليك خليه و هبط عليه الحواجب"
