لا ماهيش ملامة و بطبيعتي ماعندي علاش نلوم بالنسبة لية انت ميش غالط و الكلام الي شنقولوا تو عمري ماكنت نتجرأ نقولوا و لو في لحظة حقيقة مع روحي ،تجم تحسبوا كلام ليل ، كلام اخر السكرة ، كلام تقال وقت بديت نفيق مالبنج و عين مغمضة و عين تحب تتحل ،تغمغيم ماياخوا عليه حد ،احسبوا كيما تحسبوا المهم اسمعوا و انساه....و الله خايفة من كلامي اكثر منك خايفة و متردة نقول الي عمري ما قلتوا ،انت و لاول مرة شتسمعها "اكبر كذبة في حياتي" ،حكاية موجودة كان في مخي و طيات اوراق كتبتهم نكذب بيهم علي قلبي لعل يصدق و يذوب في عشقة ميش متاعوا و ماهوش قدها ،كي عرفتك حبيت نصدق ،حبيت نصدق الي فمة شوية مني حبك و الي الحكاية ازمة توقيت و الي انت علمتني نعيش علي حافة الهفهوف خاطر في الحافة كل شي احلى ،كل شي ملون بمطعم الخطر و عالحافة القلب يدق و العينين تلوج علي شكون يونسها و كنت انت تونسني ،حبيت نصدق الي حكايتنا حكاية عشقة و الي سكوتك مليان كلام و شدتك ايدك كلها معاني حبيت نصدق الي نفهمك كان انا ، نفهم كلامك في عز السكوت و نفهم ملامك من نظرة عين و الي قلة كلماتك رزانة و الي احضانك حنانة لكن الحقيقة موش هكة ، الحقيقة الي سكوتك هروب و خوف ، هروب من انك توعد و تخلف و تعرف الي عمرك لا تكون قد كلامك و خوف لا تزلق و يخونك لسانك ،يخونك و يقلي الي حديثك زايد و بيعان ريح للمراكب و انا هية المركب ،انا المركب الي هايمة في بحر خنارك تهز و تجيب علي كيفك و كي تقلق في اقرب مينا ترسيها و تمشي و وقت مايهزك الشوق ترجع رايس عليها و بلا كلام و من غير توحشتك ، حتي الكلام عندك محسوب و كنت نقنع روحي الي الفايدة موش في الكلام و الي السر في القلوب ،لكن لا ، من داخل نعرف باش ما تكذبش تخبي كلامك و انا بتبسيمة منك نبني قصور و نحس روحي دهر ساكنة في احلامك و كنت نقول وقت الغيبة كنت متليع و سارح في خيالي و لو موش القلب ماترجع تسهل علي احوالي ، لكن لا ،انا كنت نكذب ، نكذب علي روحي و نصدق ....في بعدك حكاياتك يطوالوا و كلامك معايا يحلى و يتلحن بموالوا ، وكي تجيني ما نسمع منك كان سلامك و انا من سلامك نصنع منامة و ننسج احلامي من ريحة بارفانك و نصدق و نضيع و نقول الضياع معاك نعمة و الهبال خيوط متعلقة عليها المحبة ،محبة لكلي كلام في كلام و محبة مبنية علي لا صار و لا كان و هذيكة الغريبة ،غريبتي انا و انت و علاكا ماعندي علاش نلوم و حتي كان لمت شعندي نقول ! لا عمرك وعدت باش تخلف و لا في وجهي حكيت باش تكذب و مانجمش نكذب سكوتك و لا نلوم علي سلام ايديك ، و تو علاش جيت !؟ جيت باش ادز المركب بعد ماخاخت عالشط و الموج ولا غريب عليها !؟ اخطاك مني انا فقت من سكرتي من بكري و تبت و الوجايع معادش نبنجها و الهروب معاد نهرب كان لروحي و حقيقتك واجهتها في المراية و فرغت منها ،كان راجع تتكلم وفر كلامك و كان راجع تسهل و تسلم خلي سلامك لحد عزيز يجم يفسروا خير مني و ارجع منين ماجيت و رتحني .
#اكرام_سويلم #كلام_الليل
