Sunday, February 16, 2014

كانت روحي

ممكن الكلام الي شنقولو تو فات عليه الوقت و جاء امخر ، امخر برشا ، ممكن الكلام هذا كان لازم نقولوا في وقت اخر ، وقت يكون عندوا فيه قيمة ، اما سعات الكبرياء يخلينا نخسروا برشا حاجات ، يخلينا نسكتوا وقت لازم الكلام و بين كبريائي الكبير و صحة راسها خسرنا بعضنا ، اليوم نتذكرها ــــــ كل يوم نتذكرها ــــــ بعد ما فات الفوت و نتمني نرجع عقارب الساعة و لو ساعة وحدة قبل ما نخسرها نقلها فيها الكلام الي ما تقالش الكل ، نعنقها ،نبوسها و انطبطب عليها ، نلومها و نعاتبها و نصيح علاها ، نقوللها الي انا متغشة منها ،متغشة برشا ، متغشة لدرجة اني نكرها رغم حبي لاها ، نتمني تقلي سامحني و نقلها السماح و نتبسموا و ننساو كل شي و نبداو صفحة بيضة ، نتمني تطلع هية زادة متغشة مني و تعيط و لا حتي ادز بالدم البارد و نحكيو ولو دقيقة في كل شي ما حكيناش فيه و نقلها سامحني و تعنقني و تبكي و نبداو صفحة جديدة ، اما تو ما قعدلي كان التمني تو خسرتها و معادش ترجع و لو سامحتها و لو سامحتني و لو سامحنا الظروف الي فرقتنا .
هي كانت اعز صاحبة لية و اول صحبة حليت عليها عينية ، كانت رفيقة دربي ،جمعتنا الدنيا ملي كان عمرنا 7 سنين ، عشنا مبعضنا كل شي ، اول عام في القراية ، اول قصة حب في حياتنا ، كنا نتشابهوا برشا اما موش الشبه الي يراوه الناس الكل ، كنا نتشابهوا في حاجات ما يعرفوهم كان انا و هية ،حاجات ما نحكيوهم لحد كان لبعضنا و حبيتها ، حبيتها اكثر من اخت و سعات من كثر ما نحبوا بعضنا كنا زادة نكرهوا بعضنا و ممكن هوني المفارقة الي ما نجمش نحكي عليها و لا نفسرها اما كنا فاهمين بعضنا و ما كان حد يجم يفهمني كيفها . علاش بعدنا؟ علاش خسرتها ؟ 
الاسباب برشا اما يتلموا في سبب واحد ، انا و هية وصلنا لمرحلة في حياتنا ولينا ثقال علي بعضنا و كيما جمعتنا الشبيهة ، فرقتنا الشبيهة و زادت بعدتنا اختلافاتنا ،انا وياه كنا ياسر نختلفوا ،نختلفوا في كل شي يجموا يراوه الناس الي دايرين بينا ، و تفرقنا .
تفرقنا خاطر جاء الوقت باش نبعدوا ،  صحبتنا ولات عبأ انا معاش نجم نهزوا ،  الحاجات الي قلناهم لبعضنا جرحونا و فما جروح صعيب تداوا ، كل سوء تفاهم ،كل عركة و كل كلمة خايبة خلقوا بيناتنا واد صعيب باش نتعداوه ، كنا مختلفين برشا ، مختلفين لدرجة معادش نركبوا علي نعضنا : هية كانت ناشطة ما تركحش في نفس البلاصة و انا كنت انسانة هادية ،هية كانت تحب الدنيا تحب تعيش كل نهار بنهاروا و انا كنت عندي اهداف واضحين في الدنيا نحب نوصللهم ماغير ريسك ، هية كانت تحتاجني معها في كل شي و انا كنت محتاجا روحى اكهو ، و اخترت نبعد صحبتنا ولات عبأ انا معاش نجم نهزوا ، كنت نحبها و مازلت نحبها لكن اخترت نبعد باش نجم نعيش ، نعيش بعيد علاها و لا نتعلم نعيش بلاش بيها و خليتها و مشيت ، مشيت وانا مجروحة منها و خليتها مجروحة مني و تعلمت نعيش ، كنت نخمم فيها في كل مرة تضياق علية الدنيا ، كنت نتوحشها برشا و خممت الف مرة نهز تاليفون و نكلمها و نقلها كلام عمري ما قلتهولها لكن كبريائي ما سمحليش و ما نجمثش نسامحها ، و تعداو سنين و احنا كي الاغراب بيناتنا كان السلام و قد ما مدتلي يداها بالصلح ، جاني الصلح صعيب علية و خيرت نبعد ، الحقيقة حياتنا بلا بعضنا كانت خير ببرشا "كالم" بلاش "دراما" اما كانت فارغ ، عالقليلة حياتي انا كانت فارغة بلا بيها اما كانت مرتاحة ، تو كي نخمم فيها نتمني نقلها "راني نحبك ، كنت نحبك مازلت نحبك و شنقعد ديما نحبك ، انت علمتني نكون انا ، و مانيش نادمة الي عرفتك ، انت تعرف الي انت موجودة في كل صفحة في حياتي ، ضحكنا مابعضنا و بكينا مبعضنا و حبينا مبعضنا ، و كيما قتلك في اخر مرة حكينا فيها و قتلي الي انت ديما تتذكرني ، كان انت تتذكرني انا عمري ما نسيتك قتلك رد بالك علي روحك و قتلي تهني صاحبك راجل ، انت كنت خير من الف راجل ، نحب نقلك سامحني ، سامحني خاطر بعدت ، سامحني خاطر وقت كنت نجم نسامحك اخترت اني نقسي قلبي و نعطيك بالظهر ، سامحني خاطر ما مدتلكش يدي وقت كنت محتاجتني نرجعلك و ناقف معاك ،  سامحني خاطر خليتك ، سامحني خاطر فقت امخر ، امخر برشا ، نشالله دموعي الي يهبطوا كل ما نتذكرك يخليوك تسامحني ، نشالله دعاية ليك بالرحمة يعوض كل دقيقة ما وقفتش معاك فيها ، و نشالله كل ما زيارة ليك في قبرك تنسيك في كل مرة كلمتني فيها و ما جيتكش ، نشالله يجينا نهار و نتلاقاو عند ربي و قلوبنا صافية و ننساو الي احنا بعدنا ، نشالله تطللع مرتاحة في تربتك ،نحبك "
نتمني الوقت يرجع ساعة قبل ما نخسرها ،خاطر الخسارة في الدنيا ساهلة اما الخسارة في الموت اصعب ببرشا ...الله يرحمك و ينعمك و يعوضك في جنتوا الخير 

KOUKOU


http://www.youtube.com/watch?v=NAkePPV-DxQ

Friday, February 14, 2014

لاسامي هية هية و القلوب تغيرت

من بكري ما كتبتش و ما عبرتش الستيلوا و الورقة ،ما كتبتش كلام يستحق باش يتكتب و خاصة في الليل ، عندي مدة نحب نحكيلكم حكايات ما قيتش كيفاش اما اليوم قلبي معبي و كلام الليل يتحير في اليل و يحيرني معاه ،عاد قلت نكتب و الف كلمة و لا تنهيدة 
تعرفوها الفازة وقت تختاروا عبد من "الانتوراج" متاعكم ،تعطيه بلاصة معينة في قلوبكم و تحبوه ، تعطيوه قدر انتوما متاكدين الي هو اكبر من قدروا اما بيناتكم و بين ارواحكم تقولوا بالك يجي نهار و يوصل للمستوي الي حطيتوهولوا ، الشخص هذا الي قد ما يغلط تسامحوه و ما تاخذوش عليه و ديما تعديولوا و تقولوا تو يفهم و يقدر ، تو يفيق الي ما لازموش يخسرك كصديق ولا صديقة و لا كشخص مهما كانت نوعية العلاقة ،تعرفوها كي يطوال الوقت الحاجات الي خلاتكم تختاروه هو بالذات تبدي تضمحل و تتنحي و رغم هكا تبداو شادين صحيح انكم تصلحوا و ترجعوا كيما قبل ، البيدايات ديما احلي، لسوء الحظ كل ما انتوما تكبشوا كل ما هالشخص يزيد يبعد و يحس روحوا حاجة كبيرة و قد ماهو يبعد قد ما انت تزيد تخاف من خسارتوا و قد توصل اطيح من روحك باش تحفظ علي صورة العبد هذا الي موجودة كان في خيالكم و الي تختلف برشا عالحقيقة و كل ما انت اطيح هو يزيد يتغر ،خاصة اذا دخلوا ناس جدد لحياتوا ...نقلكم حاجة صحيح الكلنا نحتاجوا لصديق و لشخص "سبيسيال" نهربولوا وقت الغصرة و الخنقة ، الكلنا نحتاجوا عبد نحسوه ما يحسبش معانا ،لشخص نجموا نتصرفوا معاه علي طبيعتنا و حتي علي غير طبيعتنا ، الكلنا نحتاجوا لملجأ نتخباو فيه و لصديق يمدلنا يدوا و يطبطب علينا ،اما ا
لحق يقال صعيب باش تلقي حد يستاهل و حتي الي في اللول يستاهل مع الوقت كل شي يتبدل و وقت تبدا تري الي كل شي تبدل خليه و امشي خير ، اخسروا خير ملي تخسر روحك ،ممكن تحتاج لكف باش تجم تحل عينيك و تري الي الانسان هاكا معادش نفس العبد الي انت عرفتوا اما عاجلا ام اجلا تفيق و وقتها تبعد خير ....حط في بالك علاقتك مع بعض الناس نفحة اما هوما يطيروهالك و كيما قالت 
ذكري يرحمها "الاسامي هية هية و القلوب تغيرت"

http://www.youtube.com/watch?v=pRGnnC35b6Y

KOUKOU

Thursday, October 31, 2013

ذكريات

علاقتي بالذكريات قوية ،عمري لا كنت من الناس الي تنسي فيسع و كنت ديما نحس الي الماضي مهما كان خايب ولا حلو حاجة تجينا من الزمان هدية و اذاكة علاش كل دقيقة في حياتي نسجلها ملي تعلمت نشد ستيلو بين يدية ، تعداو سنين و سنين و عملت عرصة بال'لي جورنال انتيم" ، كرارس و اجوندات كل ما نسكر وحدة فراقها يعز علية ، نرماها في درج مسكر و نبدي صفحة جديدة ، لكن عمري ما ننساها نجبدها و نتصفح اوراقيها و نقراها كل مديدة ، سعات يضحكوني كلمات كانوا في نهار يوجعوني و سعات كلمات كان يملاوني بالفرحة يبكوني ، فما اوراق مزينين بكحل عنية و اوراق كل ما نقراهم يتبدلوا علية لكن عمري ما لوحت منهم حاجة ديما نحسهم جزء مني ما نجمش نبعدوا علية ، ما نعرش كيفاش البارح تشجعت كان عندي دفتر فيه حكاية حبيتها و كبرت فية ،دفتر من كثر ما نخاف عليه كنت ديما هازيتوا معايا، مآ نعرفش البارح كياش تشجعت قصيت اوراقيه علي غفلة و رميتهم في بوبال و تعديت و خليتهم ورايا ، ما فهمتش كيفاش ما دمعتش ، ما ودعتهمش ، ما قريتش منهم حتي حرف و ماعملتلهمش طقوس خاصة كيما ما كان في بالي ، رميتهم و مشيت و ما توجعتش ،بهت في روحي و روحي بهتت فية ، كي وصلت للدار نظرت في المراية و خممت كيفاش كلماتي هانوا علية ؟ و في لحظة فهمت الي كان غالي علي قلبي موش الدفتر لكن الانسان الي ساكن بين اوراقيه بضحكاتوا و هبلاتوا و حتي غزراتوا لية و كيف هان اسموا علية هانت الذكري معاه ...لوحت الدفتر

 اه حقا خليت منوا الغلاف ، الذكري هذي قعدلي منها كان القشور ،وقيت نبدا صفحة جديدة 

KOUKOU

Wednesday, October 23, 2013

اكتوبر23 / تونس

اكتوبر23   تاريخ مالتواريخ الي ما نجمش ننساهم ، و ملي فقت النهار هذا الصباح عامين لتالي كنت نعرف الي انا مانيش مش ننساه اما ما كنتش نعرف الي انا مش نتذكروا علي جال الاسباب هذي ، كنت في بالي نهار هايل وليت فيه عندي الحق باش نعبر علي رايي و ننتخب علي جال مصلحة البلاد و الي صوتي مهم و صوت كل واحد فينا و حسبت الناس الي ما مشاوش صوتوا ماهمش وطنين و ما يحسوش عالبلاد ، طلعت انا الي ما نحسش ، ما حسيتش الي شي ماهوا ما شيتبدل و الي الناس الي ما صوتوش عندهم الحق ....نفيق اليوم علي موتي و جرحي و اعتصامات و ناس بطالة و ناس ميش لاقية تاكل ،ناس تقتل باسم الدين و ناس يسبوا في الدين و هو الدين بيناتهم ضايع ، ناس مع "الشرعية" و ناس ضد و الثنين موش فاهمين ساسهم من راسهم ، شعب كامل ضاع و الحيط الي دخلنا فيه طاح سايي معادش يسيع و مازال ما تبدل شي ، تصاور الموتي معادش تقشعرلي لحمي كيما بيكري و معادش تهبطلي دموعي كيما قبل تسانست عليها و ولات كلمة الله يرحمهم تكفي و غير هك زايد ، الفقر عرفت الي هو موجود في تونس برشا بعد ما كنت قبل حاسبتوا اشاعة و العباد الي يتظاهروا و يطالبوا بالاسقاط الحكومة وليت حاستهم فاضين شغل و ما عندهم صنعة و كيما قالت طفلة نعرفها الحكومة ساقطة من عند ربي ما غير ما تطالبوا باسقاطها ...ولله تونس نموت عليها اما سعات نعطي الحق للي يحب يهج منها حتي هية تبدلت علينا ، حكامها نساو "كلكم رع و مسؤول عن رعيته" و ما قعدوا متذكرين كان كراسيهم المبطنة و شعبها حفظ من حرية التعبير كان تطيح القدر و ديغاج ...كان صلحنا رواحنا و عقلياتنا راهي تونس تصلحت ...ماللخر هنا ڨعدين و ساعا ساعا نتكوا
 شعندا نعملوا ربي يهدي و كهو


KOUKOU

Tuesday, October 22, 2013

ما يدوم حال

ما يدوم حال ، جملة ديما نقولوها في الغصرات باش يبدي عنا امل في انوا شيفرجها ربي و تتحل اما زادة تجم تنطبق عالناس ، الناس اكثر حاجة تتبدل في الدنيا ، اصحاب تعطي فيهم ثيقتك و تحكيلهم اسرارك يغدروك يخونو العشرة و كان ما غرسوش سكينة في ضهرك  ينضرولك في عينيك و حتي عالفرحة يحسدوك، حبيب بين صباح و ليل و بعد ما كان نهار كامل يشعرلك و يقلك ما نجمش نعيش بلاش بيك يشلق الي هو معادش يحبك و الي انتوما ماكمش ما شتتفاهموا و يخليك و يمشي ، تي حتي اهلك و اماليك سعات من كثر ما تغدرت تشك فيهم ...اما نرمال موش كان هوما يتبدلوا انت زادة تتبدل بعدهم ...تتذكر روحك كي كنت اصغر ؟؟ كي كنت علي نيتك و تصدق كل شي و حاسب الناس الكل باهين و في بالك بالرسمي كي تعمل الخير تلقي كان الخير و كي تحب الناس يحبوك ، تتذكر روحك كي كنت ما تكره حد و ميكش مجروح من حد ؟؟ إيييييه راك كيفي تقول يا حسرة !! 
انا زادة نقول يا حسرة حمد الله تبدلت و وليت نعرف نحكم عالناس مالول و ما نتغشش فيهم و وليت نقري حساب الي يجموا يتبدلوا علي غفلة و يصدموني و وليت نعرف الي ما يدوم حال ، ماللخر حمدلله معادش بهلولة كيما كنت كان قعدت هك راهم كلاوني و راهي دمعتي علي خدي اما سايي تعلمت ناس بكري قالوا ما تبكي على كرهوك ابكي عالي حسبتهم اصحاب و خانو العشرة و باعوك و انا نقلك ما يستاهل حد دمعة ما تبكيش اصل و الي باعك موش بيعوا صدقوا اصل ولا احسب ميشيانوا نعمة و بوسوا و حطوا تحت الحيطة ههه 


KOUKOU

Wednesday, October 16, 2013

ما نعرفش علاش

الحالة هذي الي تجي من وقت الوقت و انت تبدا تقول فادد ما نعرفش علاش ، انا تجيني برشا هالحالة ممكن خاطر نخمم فوق اللازم و سعات في حاجات ما لازمش نخمم فيهم و بيني بينكم الكلنا نقولوا الي احنا حزانا ما نعرفوش علاش اما الحقيقة نعرفوا اما ما نحبوش نستعرفوا ...
اك الحكاية الي ما نحكيوها لحد و حتي كي نحكيوها شطرها "سونسوري" مقصوص و مخبي في قلوبنا ، الحكاية هذي الي حتي الارواحنا سعات ما نحبوش نحكيوها و الي نهزوها و في اغرق بلاصة من قلوبنا نخبيوها و كل تفصيل من تفصيلاتها نسكروا عليهم في نفق الذاكرة المنسية و نحاولوا باش ما نفكروش فيها و الغريبة كل ما نضلوا فارحين برشا نتذكروها و كل ما نضلوا حزانا زادة نتفكروها ...ما نسيناهاش اما نتناساو فيها و الاكثر هالحكاية مربوطة بقلوبنا و خيباتنا و الحاجات المستحيلة في الدنيا و القدر و آلمكتوب و اك اللوغة ....
ميسالش نتذكروها ، ميسالش تجينا شوية نوستالجي و كان لزم حتي نهبطوا دمعة عمرها سنين و ميسالش نخبييا و نقولوا" ما نعرفش علاش "، بالك هكا براو الكل ،موش لازم نعرفوا علاش المهم نحسوا
انا شنعمل كي يصيرلي هكا !! ؟؟
نقرا حاجة نرا فيها روحي ، نتفرج في فيلم من كثر الرومنسية الي فيه يبكي ، نحط غنا نحبوا كيما فيروز و حليم و جماعة الزمن الجميل اما سعات نقوم نشطح لين نتعب و نبيّل ، نمشي ندوش و نضرب ساعة تحت الماء السخون لعلا يغسل هالحالة معاه و سعات نسمع غنا واطي من نوع "هس هس هس بص علية بص" و "واوا" و نضحك لين نشبع ...و تمشي الحالة كيما جات زادة ما نعرفش علاش


KOUKOU 

Friday, October 11, 2013

سطل ماء بارد

تحب تعرف شنية حرب الاعصاب !!
ساهلة برشا هي ما يعبر عليه ب"تصب عليك سطل ماء بارد" و الحاجة هذي تصير عادة وقت انسان يعملك فازة تخليك تتنقل من حالة نفسية الي اخري في دقيقة ، او شنقلك كيفاش :
وقتلي تطلب حد توحشتوا و توحشت تسمع صوتوا و يبدا قلبك يدق و انت تسمع في رنة تالفونوا و تحضر في الف طريقة تقول باها الكلام و يعلق عليك
وقتلي تبدل پروغرام نهار كامل باش تلاقي انسان و تشوفوا في بلاصة اخري خلف احلامك و تمشيلوا و عينيك تلمع بالفرحة و يقابلك ببرودة يديه و تبسيمة صفراء
وقتلي تستني من حد كلمة كان يقولهالك تهزك لسابع سماء و تطيرك من غير جوانح و تستني برشا ما غير ما تسمعها
وقتلي الكلام يوجع و السكوت يوجع اكثر ، وقتلي تتمني الارض تتشق و تبلعك و تندم علي حاجة بسيطة عملتها كيما انك تعلقت بشخص ما يستاهلش ، و موش هاذم برك الحاجات الي تعبر علي سطل الماء البارد فما برشا اخرين يوجعوا ...انا نحكيلكم عالفازات هذي جوست باش نقللكم الي فما حاجة باهية وراء هذا الكل هي انوا كي كي يتصب عليك سطل الماء البارد تولي تقدر قيمة الشمس اكثر ...و ما احلاش من الشمس و الفاهم يفهم والي ما فهمش تو مرا جايا نفسرلوا


KOUKOU