Monday, March 24, 2014

بلا بيها ما نجمش نعيش



نلوج علي روحي ما لقيتهاش , درا شنية حكايتها الايامات ولات ديما ضايعة تخرج مني و ما ترجعش  , تبعد لبعيد و قد ما اناديلها تعمل روحها ما تسمعش , ممكن متغشا خاطرني سعات نصيح عليها , و سعات تصيح علية و يولي بيناتنا كلاش 
نطردها تقولي نرمال منك نخرج و ما نرجعش , اما انا نحبها و كان ما جيتش نخاف عليها ما نلومهاش 

,  هية كثرت الحق قد ما ننصحها تطفيني و تنظرلي نظرة على نصحها ما تشجعش , حاسبتني غائرة منها ...

 اي اي روحي و نعرفها كيفاش تخمم في بالها خاطر هية تعمل الي تحب و ما يهمها في كلام حد و ديما نافحة بروحها لا يهمها ذم و لا سب  , في بالها غايرة منها من سحر ضحكتها  من جوها , من قوتها كي ما تسكت الا ما تقول كلمتها,  من نزواتها , شهواتها  , و من تصعصيعها و هبلتها حاسبتني نربط فيها  و نقمع في حريتها.....

أذاكة علاش روحي تكرهني,  و  تكره لحمي و شحمي , تكره الشقف الي حاصرتها فيه , اذاكة علاش هاربة مني و كل ما نتقابلوا في عوض نهنتلها تهنتلني,  حاسة الي انا رابطتها , ظالمتها كي فية مسكنتها ، حاسة الي انا مقيدتها , ساجنتها معذبتها و بعقلي و رزني قاتلتها ..

تكرهني تكره منضري كي تشوفوا في مرايتها , و قد ما نفسرلها الي هية انا و انا هية ما تصدقش و تمرڨ فية ...

 روحي روح جامحة طايرة بلاش جوانح , راسها صحيح اما خفيفة تميح كل ما تهب عليها نسمة , ولا تنفخ عليها ريح ..قد ما نقريها و نوريها اتلفني و ما تقدرنيش,  رغم تعرف الي انا ننصحها خاطر نحبها ما تعذرنيش ..

 اذاكة علاش هاربة مني ، هاربة من مخي من مبادئي و كان تلقي تتبري مني,  اخر مرة حكيت معاها جرحتني ممكن خاطر شطر كلامها صحيح,  روحي طايشة و كي تخرج وحدها تضيع اما انا بلا بيها ما نجمش نعيش ...عندي ...ايام ما ريتهاش اما نعرفها حنينة قد ما تهيم و ادور ترجعلي 
وحدي ما تخلنيش 

KOUKOU

Tuesday, March 11, 2014

عندي مدة ما حلمتش


 غريبة انا مالناس الي كل ما نغمض عنية نحلم و سعات نحلم و عينية محلولين

: سعات نحلم احلام مهبلة و مجانين

طرف من فيلم اخر اليل نفة من فازة صارت قدامي و تفويحة من حديث النساوين

 تخلويض و برشا حكايات في بعضهم مخلطين

، سعات نحلم بحاجات تعداو و فات عليهم عام و عامين

 تفاصيلهم والكلام الي فيهم تقال كاينهم في مخي موشمين

 نشوفهم في منامتي كاينهم توا صاروا و هما عمرهم سنين

 سعات نحلم بحاجات اخرين و سعات نحلم بين احنا الثنين

 ، سعات تجيني ما بين نومين

، اما تجيني متبدل ، انت اما راجل اخر ،

بيناتكم برشا صيفات متشابهين

 نفس النظرة و العينين

 نفس الضحكة و الزين

 هو زادة كيفك حنين

راجل يتشبهلك برشا اما فيه حاجات مبدلين

 ما نعرفهمش شنوما

ممكن خاطروا يقول الكلام الي انت تتردد و ما تقولوش

 الكلام الي منك نحب نسمعوا و ما نسمعوش

 ممكن هو يفهم الشي الي انت ما فهمتوش

 و يعمل الي انت في الحقيقة ما عملتوش

 الحاصل الراجل هذا انت كيما نحبك انا تكون

، و كل ما نحلم بيك نفيق نجيك

  لعل نلقاك وليت تتشبهلو و سكوتك ياكدلي الي انت ما تتشبهلوش

و اذاكة الي خلانا نبعدوا و ما نرجعوش

العجيب ملي بعدنا و ليت هو زادة في احلامي ما نشوفوش

، ملي انت مشيت حتي كي نحلم ننسي

 نفيق و نقعد ننظر لصقف البيت اما ما نتذكرش 

، هو تجي تشوف انا عندي مدة ما حلمتش

. غريبة انا مالناس الي كل ما نغمض عنية نحلم و سعات نحلم و عينية محلولين


KOUKOU

ملاحظة : نعرف الكلام هذا انت ما ريتوش و حتي كا ريتوا اكيد راك ما قريتوش ، اما اذا قريتوا نحب نقلك اليوم حلمت بيك انت موش هو ، اما الحلمة ما كانتش حلوه ، حلمت الي انا حطيتك في دبوزة و في البحر لوحتك و مشيت ،لالا موش اذيكة الفازة الخايبة ،الفازة الخايبة الي الموج رجعك لية 

Sunday, February 16, 2014

كانت روحي

ممكن الكلام الي شنقولو تو فات عليه الوقت و جاء امخر ، امخر برشا ، ممكن الكلام هذا كان لازم نقولوا في وقت اخر ، وقت يكون عندوا فيه قيمة ، اما سعات الكبرياء يخلينا نخسروا برشا حاجات ، يخلينا نسكتوا وقت لازم الكلام و بين كبريائي الكبير و صحة راسها خسرنا بعضنا ، اليوم نتذكرها ــــــ كل يوم نتذكرها ــــــ بعد ما فات الفوت و نتمني نرجع عقارب الساعة و لو ساعة وحدة قبل ما نخسرها نقلها فيها الكلام الي ما تقالش الكل ، نعنقها ،نبوسها و انطبطب عليها ، نلومها و نعاتبها و نصيح علاها ، نقوللها الي انا متغشة منها ،متغشة برشا ، متغشة لدرجة اني نكرها رغم حبي لاها ، نتمني تقلي سامحني و نقلها السماح و نتبسموا و ننساو كل شي و نبداو صفحة بيضة ، نتمني تطلع هية زادة متغشة مني و تعيط و لا حتي ادز بالدم البارد و نحكيو ولو دقيقة في كل شي ما حكيناش فيه و نقلها سامحني و تعنقني و تبكي و نبداو صفحة جديدة ، اما تو ما قعدلي كان التمني تو خسرتها و معادش ترجع و لو سامحتها و لو سامحتني و لو سامحنا الظروف الي فرقتنا .
هي كانت اعز صاحبة لية و اول صحبة حليت عليها عينية ، كانت رفيقة دربي ،جمعتنا الدنيا ملي كان عمرنا 7 سنين ، عشنا مبعضنا كل شي ، اول عام في القراية ، اول قصة حب في حياتنا ، كنا نتشابهوا برشا اما موش الشبه الي يراوه الناس الكل ، كنا نتشابهوا في حاجات ما يعرفوهم كان انا و هية ،حاجات ما نحكيوهم لحد كان لبعضنا و حبيتها ، حبيتها اكثر من اخت و سعات من كثر ما نحبوا بعضنا كنا زادة نكرهوا بعضنا و ممكن هوني المفارقة الي ما نجمش نحكي عليها و لا نفسرها اما كنا فاهمين بعضنا و ما كان حد يجم يفهمني كيفها . علاش بعدنا؟ علاش خسرتها ؟ 
الاسباب برشا اما يتلموا في سبب واحد ، انا و هية وصلنا لمرحلة في حياتنا ولينا ثقال علي بعضنا و كيما جمعتنا الشبيهة ، فرقتنا الشبيهة و زادت بعدتنا اختلافاتنا ،انا وياه كنا ياسر نختلفوا ،نختلفوا في كل شي يجموا يراوه الناس الي دايرين بينا ، و تفرقنا .
تفرقنا خاطر جاء الوقت باش نبعدوا ،  صحبتنا ولات عبأ انا معاش نجم نهزوا ،  الحاجات الي قلناهم لبعضنا جرحونا و فما جروح صعيب تداوا ، كل سوء تفاهم ،كل عركة و كل كلمة خايبة خلقوا بيناتنا واد صعيب باش نتعداوه ، كنا مختلفين برشا ، مختلفين لدرجة معادش نركبوا علي نعضنا : هية كانت ناشطة ما تركحش في نفس البلاصة و انا كنت انسانة هادية ،هية كانت تحب الدنيا تحب تعيش كل نهار بنهاروا و انا كنت عندي اهداف واضحين في الدنيا نحب نوصللهم ماغير ريسك ، هية كانت تحتاجني معها في كل شي و انا كنت محتاجا روحى اكهو ، و اخترت نبعد صحبتنا ولات عبأ انا معاش نجم نهزوا ، كنت نحبها و مازلت نحبها لكن اخترت نبعد باش نجم نعيش ، نعيش بعيد علاها و لا نتعلم نعيش بلاش بيها و خليتها و مشيت ، مشيت وانا مجروحة منها و خليتها مجروحة مني و تعلمت نعيش ، كنت نخمم فيها في كل مرة تضياق علية الدنيا ، كنت نتوحشها برشا و خممت الف مرة نهز تاليفون و نكلمها و نقلها كلام عمري ما قلتهولها لكن كبريائي ما سمحليش و ما نجمثش نسامحها ، و تعداو سنين و احنا كي الاغراب بيناتنا كان السلام و قد ما مدتلي يداها بالصلح ، جاني الصلح صعيب علية و خيرت نبعد ، الحقيقة حياتنا بلا بعضنا كانت خير ببرشا "كالم" بلاش "دراما" اما كانت فارغ ، عالقليلة حياتي انا كانت فارغة بلا بيها اما كانت مرتاحة ، تو كي نخمم فيها نتمني نقلها "راني نحبك ، كنت نحبك مازلت نحبك و شنقعد ديما نحبك ، انت علمتني نكون انا ، و مانيش نادمة الي عرفتك ، انت تعرف الي انت موجودة في كل صفحة في حياتي ، ضحكنا مابعضنا و بكينا مبعضنا و حبينا مبعضنا ، و كيما قتلك في اخر مرة حكينا فيها و قتلي الي انت ديما تتذكرني ، كان انت تتذكرني انا عمري ما نسيتك قتلك رد بالك علي روحك و قتلي تهني صاحبك راجل ، انت كنت خير من الف راجل ، نحب نقلك سامحني ، سامحني خاطر بعدت ، سامحني خاطر وقت كنت نجم نسامحك اخترت اني نقسي قلبي و نعطيك بالظهر ، سامحني خاطر ما مدتلكش يدي وقت كنت محتاجتني نرجعلك و ناقف معاك ،  سامحني خاطر خليتك ، سامحني خاطر فقت امخر ، امخر برشا ، نشالله دموعي الي يهبطوا كل ما نتذكرك يخليوك تسامحني ، نشالله دعاية ليك بالرحمة يعوض كل دقيقة ما وقفتش معاك فيها ، و نشالله كل ما زيارة ليك في قبرك تنسيك في كل مرة كلمتني فيها و ما جيتكش ، نشالله يجينا نهار و نتلاقاو عند ربي و قلوبنا صافية و ننساو الي احنا بعدنا ، نشالله تطللع مرتاحة في تربتك ،نحبك "
نتمني الوقت يرجع ساعة قبل ما نخسرها ،خاطر الخسارة في الدنيا ساهلة اما الخسارة في الموت اصعب ببرشا ...الله يرحمك و ينعمك و يعوضك في جنتوا الخير 

KOUKOU


http://www.youtube.com/watch?v=NAkePPV-DxQ

Friday, February 14, 2014

لاسامي هية هية و القلوب تغيرت

من بكري ما كتبتش و ما عبرتش الستيلوا و الورقة ،ما كتبتش كلام يستحق باش يتكتب و خاصة في الليل ، عندي مدة نحب نحكيلكم حكايات ما قيتش كيفاش اما اليوم قلبي معبي و كلام الليل يتحير في اليل و يحيرني معاه ،عاد قلت نكتب و الف كلمة و لا تنهيدة 
تعرفوها الفازة وقت تختاروا عبد من "الانتوراج" متاعكم ،تعطيه بلاصة معينة في قلوبكم و تحبوه ، تعطيوه قدر انتوما متاكدين الي هو اكبر من قدروا اما بيناتكم و بين ارواحكم تقولوا بالك يجي نهار و يوصل للمستوي الي حطيتوهولوا ، الشخص هذا الي قد ما يغلط تسامحوه و ما تاخذوش عليه و ديما تعديولوا و تقولوا تو يفهم و يقدر ، تو يفيق الي ما لازموش يخسرك كصديق ولا صديقة و لا كشخص مهما كانت نوعية العلاقة ،تعرفوها كي يطوال الوقت الحاجات الي خلاتكم تختاروه هو بالذات تبدي تضمحل و تتنحي و رغم هكا تبداو شادين صحيح انكم تصلحوا و ترجعوا كيما قبل ، البيدايات ديما احلي، لسوء الحظ كل ما انتوما تكبشوا كل ما هالشخص يزيد يبعد و يحس روحوا حاجة كبيرة و قد ماهو يبعد قد ما انت تزيد تخاف من خسارتوا و قد توصل اطيح من روحك باش تحفظ علي صورة العبد هذا الي موجودة كان في خيالكم و الي تختلف برشا عالحقيقة و كل ما انت اطيح هو يزيد يتغر ،خاصة اذا دخلوا ناس جدد لحياتوا ...نقلكم حاجة صحيح الكلنا نحتاجوا لصديق و لشخص "سبيسيال" نهربولوا وقت الغصرة و الخنقة ، الكلنا نحتاجوا عبد نحسوه ما يحسبش معانا ،لشخص نجموا نتصرفوا معاه علي طبيعتنا و حتي علي غير طبيعتنا ، الكلنا نحتاجوا لملجأ نتخباو فيه و لصديق يمدلنا يدوا و يطبطب علينا ،اما ا
لحق يقال صعيب باش تلقي حد يستاهل و حتي الي في اللول يستاهل مع الوقت كل شي يتبدل و وقت تبدا تري الي كل شي تبدل خليه و امشي خير ، اخسروا خير ملي تخسر روحك ،ممكن تحتاج لكف باش تجم تحل عينيك و تري الي الانسان هاكا معادش نفس العبد الي انت عرفتوا اما عاجلا ام اجلا تفيق و وقتها تبعد خير ....حط في بالك علاقتك مع بعض الناس نفحة اما هوما يطيروهالك و كيما قالت 
ذكري يرحمها "الاسامي هية هية و القلوب تغيرت"

http://www.youtube.com/watch?v=pRGnnC35b6Y

KOUKOU

Thursday, October 31, 2013

ذكريات

علاقتي بالذكريات قوية ،عمري لا كنت من الناس الي تنسي فيسع و كنت ديما نحس الي الماضي مهما كان خايب ولا حلو حاجة تجينا من الزمان هدية و اذاكة علاش كل دقيقة في حياتي نسجلها ملي تعلمت نشد ستيلو بين يدية ، تعداو سنين و سنين و عملت عرصة بال'لي جورنال انتيم" ، كرارس و اجوندات كل ما نسكر وحدة فراقها يعز علية ، نرماها في درج مسكر و نبدي صفحة جديدة ، لكن عمري ما ننساها نجبدها و نتصفح اوراقيها و نقراها كل مديدة ، سعات يضحكوني كلمات كانوا في نهار يوجعوني و سعات كلمات كان يملاوني بالفرحة يبكوني ، فما اوراق مزينين بكحل عنية و اوراق كل ما نقراهم يتبدلوا علية لكن عمري ما لوحت منهم حاجة ديما نحسهم جزء مني ما نجمش نبعدوا علية ، ما نعرش كيفاش البارح تشجعت كان عندي دفتر فيه حكاية حبيتها و كبرت فية ،دفتر من كثر ما نخاف عليه كنت ديما هازيتوا معايا، مآ نعرفش البارح كياش تشجعت قصيت اوراقيه علي غفلة و رميتهم في بوبال و تعديت و خليتهم ورايا ، ما فهمتش كيفاش ما دمعتش ، ما ودعتهمش ، ما قريتش منهم حتي حرف و ماعملتلهمش طقوس خاصة كيما ما كان في بالي ، رميتهم و مشيت و ما توجعتش ،بهت في روحي و روحي بهتت فية ، كي وصلت للدار نظرت في المراية و خممت كيفاش كلماتي هانوا علية ؟ و في لحظة فهمت الي كان غالي علي قلبي موش الدفتر لكن الانسان الي ساكن بين اوراقيه بضحكاتوا و هبلاتوا و حتي غزراتوا لية و كيف هان اسموا علية هانت الذكري معاه ...لوحت الدفتر

 اه حقا خليت منوا الغلاف ، الذكري هذي قعدلي منها كان القشور ،وقيت نبدا صفحة جديدة 

KOUKOU

Wednesday, October 23, 2013

اكتوبر23 / تونس

اكتوبر23   تاريخ مالتواريخ الي ما نجمش ننساهم ، و ملي فقت النهار هذا الصباح عامين لتالي كنت نعرف الي انا مانيش مش ننساه اما ما كنتش نعرف الي انا مش نتذكروا علي جال الاسباب هذي ، كنت في بالي نهار هايل وليت فيه عندي الحق باش نعبر علي رايي و ننتخب علي جال مصلحة البلاد و الي صوتي مهم و صوت كل واحد فينا و حسبت الناس الي ما مشاوش صوتوا ماهمش وطنين و ما يحسوش عالبلاد ، طلعت انا الي ما نحسش ، ما حسيتش الي شي ماهوا ما شيتبدل و الي الناس الي ما صوتوش عندهم الحق ....نفيق اليوم علي موتي و جرحي و اعتصامات و ناس بطالة و ناس ميش لاقية تاكل ،ناس تقتل باسم الدين و ناس يسبوا في الدين و هو الدين بيناتهم ضايع ، ناس مع "الشرعية" و ناس ضد و الثنين موش فاهمين ساسهم من راسهم ، شعب كامل ضاع و الحيط الي دخلنا فيه طاح سايي معادش يسيع و مازال ما تبدل شي ، تصاور الموتي معادش تقشعرلي لحمي كيما بيكري و معادش تهبطلي دموعي كيما قبل تسانست عليها و ولات كلمة الله يرحمهم تكفي و غير هك زايد ، الفقر عرفت الي هو موجود في تونس برشا بعد ما كنت قبل حاسبتوا اشاعة و العباد الي يتظاهروا و يطالبوا بالاسقاط الحكومة وليت حاستهم فاضين شغل و ما عندهم صنعة و كيما قالت طفلة نعرفها الحكومة ساقطة من عند ربي ما غير ما تطالبوا باسقاطها ...ولله تونس نموت عليها اما سعات نعطي الحق للي يحب يهج منها حتي هية تبدلت علينا ، حكامها نساو "كلكم رع و مسؤول عن رعيته" و ما قعدوا متذكرين كان كراسيهم المبطنة و شعبها حفظ من حرية التعبير كان تطيح القدر و ديغاج ...كان صلحنا رواحنا و عقلياتنا راهي تونس تصلحت ...ماللخر هنا ڨعدين و ساعا ساعا نتكوا
 شعندا نعملوا ربي يهدي و كهو


KOUKOU

Tuesday, October 22, 2013

ما يدوم حال

ما يدوم حال ، جملة ديما نقولوها في الغصرات باش يبدي عنا امل في انوا شيفرجها ربي و تتحل اما زادة تجم تنطبق عالناس ، الناس اكثر حاجة تتبدل في الدنيا ، اصحاب تعطي فيهم ثيقتك و تحكيلهم اسرارك يغدروك يخونو العشرة و كان ما غرسوش سكينة في ضهرك  ينضرولك في عينيك و حتي عالفرحة يحسدوك، حبيب بين صباح و ليل و بعد ما كان نهار كامل يشعرلك و يقلك ما نجمش نعيش بلاش بيك يشلق الي هو معادش يحبك و الي انتوما ماكمش ما شتتفاهموا و يخليك و يمشي ، تي حتي اهلك و اماليك سعات من كثر ما تغدرت تشك فيهم ...اما نرمال موش كان هوما يتبدلوا انت زادة تتبدل بعدهم ...تتذكر روحك كي كنت اصغر ؟؟ كي كنت علي نيتك و تصدق كل شي و حاسب الناس الكل باهين و في بالك بالرسمي كي تعمل الخير تلقي كان الخير و كي تحب الناس يحبوك ، تتذكر روحك كي كنت ما تكره حد و ميكش مجروح من حد ؟؟ إيييييه راك كيفي تقول يا حسرة !! 
انا زادة نقول يا حسرة حمد الله تبدلت و وليت نعرف نحكم عالناس مالول و ما نتغشش فيهم و وليت نقري حساب الي يجموا يتبدلوا علي غفلة و يصدموني و وليت نعرف الي ما يدوم حال ، ماللخر حمدلله معادش بهلولة كيما كنت كان قعدت هك راهم كلاوني و راهي دمعتي علي خدي اما سايي تعلمت ناس بكري قالوا ما تبكي على كرهوك ابكي عالي حسبتهم اصحاب و خانو العشرة و باعوك و انا نقلك ما يستاهل حد دمعة ما تبكيش اصل و الي باعك موش بيعوا صدقوا اصل ولا احسب ميشيانوا نعمة و بوسوا و حطوا تحت الحيطة ههه 


KOUKOU