بلاصة غريبة

في الوسط.... بلاصة غريبة بين قلبي وعقلي
موش منطق و موش احساس...
هوني كل شي متبدل...
الأحداث و المشاعر و الناس...
هوني حقيقة تخوف و ماعندهاش ساس...
هوني حاجات موش فاهمتها و تصاور غريبة مكفنتها...
منهم تصويرتي انا...
تصويرة قديمة و مدغدشة و كلها خطوط و ماتتشبهليش...
تصويرة مخبيتها على روحي فيها الماضي الكل...
فيها الخايب و المصايب و الاغلاط و العقد الي مالهمش حل...
هوني بلاصة بين قلبي و عقلي...
موش سحاب و موش سماء و لا تغرب فيها شمس و لا يطلع فيها قمر....
هوني كل شي عريان...
العباد كي نراهم ، بلا اعذار بلا قيمة و قدر...
نراهم كيما هوما بلا زينة بلا محبة ادغدش نظر...
الذكريات مشوهة بالحقيقة بالكلام الواضح موش المتخبي بين سطر و سطر...
هوني قلبي ماعندوا سلطة مايجم يغلف شي بالمحبة...
لا يجم يزيد لا ينقص لا يشعل فنار...هوني في الظلمة تتربى...
تتحل عينية و ماعندي وين نتخبى...
ماعندي باش نوهم روحي و مانجمش نكذب...
هوني الحاجات الي ترعب و منها نرهب....
في هالبلاصة الغريبة بين قلبي و عقلي....
موش ارض و موش شجر و لا تحرق لا تكوي و لا فيها ماء و لافيها ظل...
هوني ما يعقل عقل و لا عندوا منطق و أحكام...
لا ينفع استنتاج و لا ارشيف و لا حسابات في زمام...
هوني روحي تهوم وحدها بلا جوجمة افكار و سفسطة كلام... هوني الصمت التام...
ماعندي فاش نشد و نكبش....
هوني نجي عالغفلة و انا هاربة و مانحبش...
بلاصة غريبة و مانحبهاش و شكون يحب الحاجة الي مايفهمهاش ؟...
اما هوني تجم تفهم كل شي اذا نجمت تواجه روحك...
هوني الحقيقة...
حقيقتي و حقيقتك و حقيقة الناس...
هوني ترى الخايب الكان متغطي...
و هوني يبان معدن الحديد المصدي...
و هوني المراية تصويرتها موش معكوسة...
بلاصة غريبة بين قلبي و عقلي... بلاصة تخوف مسكونة ،مهجورة و ملبوسة...
و لو كان تعرفوا مخيبها الحاجات على حقيقتها و مخيب منظرها في مرايتها...
هوني مانحبش نجي اما هي تهزني من غير ماتشاور....
تفرش قدامي الأحداث بالجملة و الكلام و الناس و من الذكريات تصاور...
و تقلي تفرج و حل عينيك... هذا الي ليك و هذا الي عليك...
و انت و روحك ميزان...
و انا نجري و نهرب و لا نحب لا نوزن لا نعرف لا نقر...
نهرب و نلقى روحي في بلاصة غريبة بين قلبي و عقلي...
#اكرام_سويلم #كلام_الليل koukou

انت تسكر و انا نحن

ما تسألنيش علاش مشيت
بعت الي بيناتنا و نسيت
نسيت خاطر لازمني ننسى
نعفس على قلبي و نقسى
نرمي حبك ورايا و نقدم بحياتي
و نسكر على حكاياتك و حكاياتي
نكذب و نقول مع غيرك متهنية
و كي نراك ندور وجهي و نغمض عينية
ندفن وجيعتي في حيوط البيت
و نعمل روحي ماسمعتش اذا على بابي دقيت
مانحبش نحل الباب الي تسكر
و لا نحب تشوف الدمعة الي في كحلي تغدر
خاطر نعرف دموعي تزيد على وجيعتك وجيعة
و تكبر في قلبك و قلبي الليعة
و مانحبش نضعف و نرجعلك
البعد خير بعد الي صارلي و جرالك
خليك تقول على قلبي دوني و صعيب
و عشقتك عندي كلام فارغ قدام المصلحة و الجيب
خليك تقول عالفلوس حبك بايعة
خليك حاسبني قوية و انا بعدك ضايعة
نحبك تكرهني و تخطاني
تعيش حياتك و لاعاد تهمك احوالي
تنساني بسكرة و قعدة في بار
بسيجاروا و دبوسة و كأس بلار
و نرخس بعد كل رشفة و نفس
تسيل منك دمعة و يبات في مخك الحس
تقول على روحك بوجادي
و علية خاينة الي خلفت بوعدي
و في وسط السكرة تسأل علاش خليتك وسط الطريق
في ظلامك غارق لا حاسة لا شالقة بيك
و انا قعدة وراك بخطاوي
دمعتي بيدي نداري و قاطعة النفس
و مع كل تنهيدة تطلع منك سكاكن في قلبي تتغرس
دموعي سيالة في نفس البلاصة الي كانت ضحكتنا فيها ترن
انت تسكر و انا نحن
انت تبكي و انا نجن
سخفتني الدمعة المكبشة في جفونك
و خوفني لون الظلام كي تخلط بلون عيونك
ماعرفتش الراجل الي قدامي شكون
قداش قتلك ابعدني و قداش من مرة دزيتك
قداش من مرة قتلك ندمت الي حبيتك
قداش من مرة هربت منك و انا نتمنى بين ضلوعك نتدفن
نتمنى نجيك و نسلم
نقول صدفة و تعرفني نفلم
و نهد السكوت بتسليمة
و ترجع حليمة لعادتها القديمة
ننسى همك و همي
و تقلي نحبك ترجع الضحكة على فمي
و اخطانا من امك و امي
ونهرب انا وياك
انت تمشي و انا وراك
لوين ماتحب لاخر الدنيا
نشقوا البحر الي هايج قدامي و قدامك
نعطيك وعدي و ناخوا كلامك
لا نهار عليك نبعد و لا رجال نعرف بعدك
ناخوا كلامك و نعطيك وعدي
نكون مكتوبك و انتي سعدي

#اكرام_سويلم #كلام_الليل koukou 

نهرب لزناقي المدينة

المخ بيوت بيوت بيت كرا و بيت شرا و بيت تقول حانوت بيت خبابل و بيت غرابل و بيت خزين للي يفوت و بيت صياحها قبب و بيت تكتم الصوت و بيت كي جنينة نباتها يحيا و يموت و بيت فارغة تهربلها كي تتعبى بقية البيوت.. و بيت على بيت تفرق بيت الكرا بدالة الخارج منها اكثر مالساكن و بيت الشرا بيبانها حديد الي ساكنها معمر التراكن و بيت حانوت تملى و تفرغ و حانوت مسكر و لا كرية مشومة و بيت خبابل تخنق و تغص بخبابلها الڤرجومة و بيت غرابل تدور و تصفي....و بيت الخزين حيوطها من الذاكرة مرشومة...و انا تعبات علية البيوت و ضاقت بية الحيوط هربت نجري من دغاغر مخي لزنق المدينة لعل ضيق الشوارع ينسيني في ضيقي و عقلي الي مليان بيك... لعل على مدخل البلاد يخرج خيالك من مخي و يضيع ما يرجعلي و لا يرجع بية لتالي... و لعل نسرح بعيد و يتمحى طيفك تحت ضو فنار من الفنارات...و لعل البيبان الصفر و المسامر المدقوقة تنسيني في السكاكن الي في قلبي مرشوقة و في دموعي الي عليك سيول جرات...و تنسيني في بيبان عقلي الي تتحل و تطربق كي نسمع اسمك و اتطربيقها يعصر جواجية عصران... ولعل نتخمر بريحة الياسمين و الفل و تفنى ريحتك بيناتهم و منها نمل...و لعل نعلق طيفك في شلباطة منشرة على سور دار من الديار و نخليه و نروح... نروح فارغة منك و معبية بزين المدينة و نقطف نوارة من اي جنينة تفكرني الي لا حال يدوم و الورد كي حبك يذبال و ندندن بين الزناقي غناية و موال " ما تحزنشي علي كان و أفرح باللي باش يجينا
اذا المستقبل فرحان
ما تفكرشي ما تفكرشي
علاش تفكر في ماضينا... ما تحزنشي علي كان و أفرح باللي باش يجينا
اذا المستقبل فرحان
ما تفكرشي ما تفكرشي
علاش تفكر في ماضينا
ما تفكرشي ما تفكرشي
سلم ّأمرك للحنان و قول ان شاء الله زينة زينة "

الحب يعرّق

فك بيديك طلامس بدني و اتكى و ميل على صدري
من اليمين لليسار
...سطر طريقك على ظهري شوارع و زنق و عنقني... انت تلهب و انا نغلي و يعلى بينا الاحساس...
احسب بدني قيتارة و بلمساتك اعزفني الحان.. انت تنقش و انا نغني اهات و تنهيدة و نفس...انت تبعد انا نلز و عسل ريقك نمز مانحبوش يبات الحس... نشيخ بفنك و فني بين يزي و اركح و اص...
اكتبني بحبارك تشنشينة خبيها بين فخذ و فخذ... ليلة و ميش مش تتفض...كي توشويشني و وذني تعض...و تفسخ و تعاود تكتب  انت تحب و انا نرغب... تشعلني تزيد بية تلهب و خليها توڤد شرار... و بلمسة شعل ناري و نارك و ادفن اسراري و خنارك و اغطس فية و اكتب اشعارك بين الرقبة و الصرة... انت حر و انا حرة و احنا واحد موش ثنين...كي نقلك يزي ما تصدق اقرب لية و بدني عنق هو هكا الحب يعرق يسري بين صدري يتسرق  بين لحمي و لحمك ما يفرق و لا تغطيني و لا تدرق عوم فية و بحر و غوص و كثر مالبوس المرصوص انت تغرق و انا نحوس... نكذب كي نقلك يزيك انت تبعد و انا نجيك نرمي روحي نغطس فيك و نعاودوا الحكاية ماللول..  مجنونة و انت مهبول لازم هكا الحب يكون غزرة و عسل و دلول و انت لية و انا ليك. و #الحب_الوان 

#كلام_الليل
#اكرام_سويلم

Mysterious times

Deep down the road....There they were...standing...metaphorically speaking...they were close to being status, In fact i dont know why they stood there not taking a single step forward...but im certain i sow her getting there first... She was a fast runner never been afraid of roads or what laying behind... She was the curious type always going her way with sparkling eyes...And flying hair...she was light as the wind... Strong like a storm... Her feet on the ground but her thoughts roaming around...taking in all what comes in her path... Keeping everything beautiful in heart and rejecting every thing else...i could see her smile with close eyes.. That's when i knew why she was never afraids of roads...
Actually she was never really there...
She was in her own world.

Him in an other hand was not the same

He was the type of person whose always afraid... Afraid of getting lost... Afraid walking alone in a path he doesn't know were it leads... Afraid of letting go of places he already know like the palm of his hand, afraid of where he was going and of what he could find.
He was always cautious...taking slow steps...i could swear he never had a notion of time... Days and nights looked the same to him...he couldn't care less whether it takes him months or years to get to where he was going... Always said the important thing is that eventually he will get there But his road seemd to have no end.
When she first came across him the hands in her watch stoped, marking midnight...and i could see the confused look in her eyes As she took her last step. As for him it was then when he realized the importance of moments...the step he took was the most important impulsive step he took in his entire life.
As he faced her it seemd that two dimensional worlds collapsed.. And as they held hand their souls fused to one...And nothing existed any more except of "now"... A continous recored of now.

Everything was silent...except of their eyes...everything was standing still... Except of their dancing soul going in and out of their two bodies.. And they stood there in the middle of the road.
It was the first time she got lost... Lost in his eyes And it was the first time he didn't feel afraid of what it could happened "now".
The watch marked midnight...a dark mysterious time... And it never stared ticking again as there they were... standing... Metaphorically speaking... They were close to being status... But their soul danced every where.

#اكرام_سويلم #كلام_الليل #koukou

عشرين و عشرة

عشرين و زيد بعد العشرين ويبة.... عشرين غلطة و عشرين درس و دروس الدنيا صعيبة....عشرين وينك معاش اطل و عشرين هاك جيت بعد ما طولت الغيبة.... و عشرين فرحة مسروقة مابين الاتراح....و عشرين شمس تهل من صباح لصباح... و عشرين تبسيمة تتسرسب من بين دمعة سيالة.... و عشرين شكوى من هالحالة... و عشرين فرج من بعد شقى.... و عشرين قلب من جرحوا برى... عشرين و من بعد العشرين عشرة.... ناس تمشي ما ترجع و ناس ترى بالعشرة... عشرين كلمة مغلفة حنانة و عشرين ضحكة رنانة و عشرين عام عمر اياموا تتعدى بفيانة...و تقعد الدنيا في عينينا مزيانة... خاطر نحبوا من قلوبناو قلوبنا بالحب مليانة...و شيهم اذا الايام يتعدوا و العمر يجري ورانا....الي كيفي و كيفك مايحسبوش الارقام... نحسبوا بلون الشمس كي يتبدل في الفجاري،بحرارة الروح،بالدفى،بالصحبة،باللمة،باليد الي ترقرق اذا مالقلب بكى...بالذكرى ،بالحلمة، بتعنيقة الغايب اذا جاء...و خلي يتعدى بعد العشرين عشرة مادام القلب مازال يمن بالعشقة مدام ما بين ضلوعك غشير مافاتش العشرة مازال يرى الدنيا مزيانة....💖

نتفكر

كي نغزرلك نتذكر...
.نشوفك بين رموشي متصدر....
نتبسم و نخبي دمعة في كحلي تغدَّر....
و نسب العقل الي في عوض ينسى يتفكر....
ممكن تبسيمتي كي دموعك كذابة....
و ممكن قلبي من قلبك تعلم الخيابة....
و ممكن تقنعت الي دنيتنا غابة....
و القوي فيها الي يغدر....
كيفك وليت نساية و على صبري نزيد صبر و نصبر....
و نقول وفات الحكاية و الي بيناتنا نشح و تبخر....
و كي تهل الڤمرة في سمايا نشكيلها ملي على قلبي تكبر...
و "يا نجوم الليل الضواية انا عندي معاك الف حكاية و كلام طويل..."

#اكرام_سويلم #كلام_الليل