نحبك

خاطرك الكتف الي قد مانتكى عليه ديما هاززني و الظهر الي حاملني و عمروا ماتشكى من رزني
خاطرك #الراجل الي عمروا ماغدرني و لا قالي كلمة تغيرني 
خاطر حبك مزيني و قلبك مقدرني
و قد مانغلط و ننسى و سعات نقسى نلقاك غافرلي و مستحملني
مافماش قبلك و لا بعدك و حتى كان فمى نسيتوا و خرجتوا من مخي و مني 
انت الحاضر و المستقبل الي على يديه مكبرني
خاطرك الوحيد الي يستحق ماخير مني
#نحبك... خاطر انت العرص متاع الحب ...
موش نظرة و تبسيمة و كلام كتب ...
انت الاصل ،الساس الي عمروا ما يطيح...
الوعد و العشرة و العشق الصحيح....
#نحبك ...بالتعب الي فية و الخوف الي ساكني...
نحبك خاطرك ساكن فية و لقشة مني....
خاطرك ما تتبدلش ،انت هكا من وقت ما عرفتك،من اول دقيقة....
تعيش بلا ماسك بلا وجه سوق ،تعيش بالحقيقة....
و انا نحبك ....
نحبك قد الدنيا الكل و وسع العالم و بعد السماء و كبر البحر ....
نحبك قد غنايات فيروز و نقشات نزار و القهوة العربي كي تصب المطر ....
نحبك بالقوة الي تظهر علية من برا و بالقلب الي يرعش من كلمة....
نحبك خاطرك العمر الي تعدى و الروح الحلوة و بنة الحلمة ....
خاطر بلا بيك مانجمش نكون....و عليك مستحيل نهون ....
نحبك....خاطر حبك حكاية ما توفاش و كي توفى تتعاود ماللول ....تتعاود ،تتعاود كي التخميرة ....و نسكر بيك و نطير و نعلى لفوق...#و_نزيد_نحبك.

#اكرام_سويلم

حب

موش غالط انك تحب روحك... و موش غالط انك تشوف روحك بعين مزيانة، بالعكس الإنسان الي مايعرفش يحب روحوا مايجم حد يحبوا... شوف روحك سمحة شوفها من داخل بقلبك على قد حبك للدنيا و على قد حبك للناس.... الدنيا بلا حب ماتسواش.... شوف روحك محلاك كي تسامح، كي تبتسم، كي تنسى الي مايتنساش، كي تضعف و ترجع قوية، كي اطيح و تقوم، كي في الغصرة ماتلقى كان روحك... كون انت الواد و كون حجروا، المهم عيش... عيش بعين مزيانة و ضحكة رنانة و قلب كلوا حنانة.... حنانة و حب....الخايب الكل خرجوا من حياتك و دوم لروحك و قوم بروحك و حب روحك
                             
                                   Koukou
#اكرام_سويلم

نستحق

معاك حاسة روحي على درجيحة معلقة في السماء ، طفلة صغيرة فرحانة طايرة بكلمة منك نعلى لفوق و نسيب شعري على اكتافي يهفهف و سعات يمس في شفايفي و يذكرني الي انا مرا ، و في لحظة نحس روحي هازة حمل السنين الي تعداو و نرجع نكبر 100 سنة ، نتلفت نلوجك بحذاية و مانلقاكش و نخاف يتقطعوا الخيوط المعلقة في الهواء.
معاك نحس روحي في حلمة ،حلمة مزيانة مانحبش نفيق منها، كي نرى تبسيمتك و نظرة عينيك نزيد نغرق في السابع منامة و نكبش في الحلمة ،و خاطرها حلمة خايفة نفيق ....خايفة نفيق و مانلقاكش...كي يطير علية النوم وجوه الصباح و نسمع الفجر يذن ،نقرالك من كل سورة ثلاثة و ندعي لربي ، يا ربي "لا تعلق قلبه بي و ارزقه خيرا مني" ندعيلك و قلبي يوجعني ، قلبي الي يدق ثلاثة دقات كي نسمعك تقلي نحبك ،قلبي الي يدق مع كل كلمة توحشتك و يرفرف مع لمسة يديك.
توحشتك، و الدنيا موحشة بلا بيك.

اما لازمني نبعد ،لازمني نمشي و نخليك ، لازمني نكذب و نقول عمري ما حبيتك و لا كنت ليك ، لازم و مانجمش خاطر نحبك ، نحبك موش نحب بدنك و الا نحب لهوتك بية ،نحبك رغم مساطتك رغم تنرفزني رغم نكرهك و نكره كرهي ليك...و نكره برشا حاجات فيك و نحبهم.
نتمنى جيت نجم نزيد نكرهك و الا نزيد نحبك ،نتمنى جيت نجم نختار يا ابيض يا اكحل ، اما موش بيدي القرار ،الابيض وساخ و الاكحل غدار و انا بين البينين،  و مانجمش نتشكى خاطر قلبي حب هكا   و انت عندك الحق ،اما كيما انت تعلمت ماتعطيش كل شي انا تعلمت مانقبلش باقل ملي نستحق.

و انا #نستحق ، نستحق مانعيشش ضايعة ، نستحق نحب بلا خوف ، نستحق نعيش مع انسان قوى لا يهرب لا من دنيا لا من ظروف ، انسان يحبني كيما انا و مايبدلنيش ، نستحق محبة ساسها صحيح و راجل يشدني و مايسيبنيش و ما يقعدش يدرجح بية ...راجل يقدر الي عشناه الكل ، هو برشا شوية و موش برشا برشا...اما موش بالكمية و موش بالمدة و موش بالكلام ، نستحق راجل يعيشني في الواقع موش في الاحلام ، راجل بية مربوط و محبتوا حديد موش خيوط ، خاطر الخيوط تتقطع بية و نخاف نطيح من السابع سماء بلا جوانح و لا شبكة تلقفني ، و كل مانقرب للارض تتحل عينية من الحلمة و نغزر نلقى تحتي هفهوف و ينفذ رصيدي من الدعاء ، يستجيب ربي لصلاواتي و يرزقك ماخير مني و تتكسر عضامي انا...كان جات عالاعضام ميسالش اما قلبي لا...و اذاكة علاه لازمني نبعد و لازمني نفيق و نتذكر الي موش #لوجيك ...نوخر 10 خطوات لتالي و نخمم بعقلانية و نتذكر كيفاش قبلك كنت و نرجع لخطوتي الاولانية...و نرجع قوية و نقسى و نقلك باي باي ، تصبح على غد اجمل اما اجمل بلاش بية .

#اكرام_سويلم #كلام_الليل

بعد الفراق

استمر في التفكير بك ...لم تسألني كيف كان يومي اليوم ، و لكني سأجيبك : كان غائما ضبابيا كئيبا منذ فتحت عيني داهمني الحزن دون انذار ، اول ماجال في خاطري اسمك لا اعلم لما استفقت معتقدة انك ناديتني كنت شبه متأكدة اني سمعت صوتك ينادي اسمي ...كم اكره اسمي لكني اغمضت عيني علني اسمعك تناديني مجددا و عندما لم تفعل اغرقني الحزن ...كدت ان اشفق على نفسي التي هانت عليك فما تمسكت بها و لا حاربت لاجلها لكني لم افعل ....غادرت سريري، غادرته مكرهة ...منذ ايام اعتبر مغادرة سريري شجاعة مني
..يتطلبني جهد كبير حتى لا يبددني فراقك و لا يجعلني برودك ارثي نفسي...اتمنى احيانا ان اختفي ...اتكور تحت غطائي و ارجوا ان لا اكون .
كلما اغمضت عيني اتذكر ليلة قضيتها مستيقضة الى جانبك احيطك بذراعي ...اتذكر كيف بحثت عن حضني كلما تركتك ...كنت ليلتها طفلي ...كدت ان لا اكرهك ...كدت ان احبك بكل قواي لولا انك استيقضت ...و ها انت اليوم بعيد ...تركتني...و لم تعد تهفوا الى حضني ...ذاب حبك كالسكر لكنه لم يزد قهوتي الا مرارة.
ممطر يومي ...منذ غادرت المقهى ممطر يومي ...الم اقل لك انني اكره الايام المشمسة !؟
صيفك شتائي....
غادرت حياتي حين غبت يوما كاملا دون سؤال ..عرفت يومها اني فقدتك ...عرفت انك تبحث عن طريقة للهروب او المغادرة او اصلاح خطإ انك احببتني لذلك ارحتك من التفكير كانت رسالتي لك ليلتها اخر هدية مني اليك...و تقبلتها دون كلمات كعادتك
غادرت حبي يومها و غادرت طاولتي اليوم ...اتراك تغادر قلبي غدا!؟!؟
لعنني الله بذاكرة لا تنسى ...و انعم عليك بالنسيان .
استمر بالحضور الى المقهى كأنني احافظ على عهد لقاء بيننا كل صباح ...عهد لم نتعاهده ابدا ...لكنني رغم ذلك انتظرك كل صباح ...اخبرتك مسبقا ان شمسي لم تعد تشرق دون ان اراك و ...ها اني رأيتك اليوم لكنها بدل ان تشمس امطرت .

#اكرام_سويلم #كلام_الليل