نستحق

معاك حاسة روحي على درجيحة معلقة في السماء ، طفلة صغيرة فرحانة طايرة بكلمة منك نعلى لفوق و نسيب شعري على اكتافي يهفهف و سعات يمس في شفايفي و يذكرني الي انا مرا ، و في لحظة نحس روحي هازة حمل السنين الي تعداو و نرجع نكبر 100 سنة ، نتلفت نلوجك بحذاية و مانلقاكش و نخاف يتقطعوا الخيوط المعلقة في الهواء.
معاك نحس روحي في حلمة ،حلمة مزيانة مانحبش نفيق منها، كي نرى تبسيمتك و نظرة عينيك نزيد نغرق في السابع منامة و نكبش في الحلمة ،و خاطرها حلمة خايفة نفيق ....خايفة نفيق و مانلقاكش...كي يطير علية النوم وجوه الصباح و نسمع الفجر يذن ،نقرالك من كل سورة ثلاثة و ندعي لربي ، يا ربي "لا تعلق قلبه بي و ارزقه خيرا مني" ندعيلك و قلبي يوجعني ، قلبي الي يدق ثلاثة دقات كي نسمعك تقلي نحبك ،قلبي الي يدق مع كل كلمة توحشتك و يرفرف مع لمسة يديك.
توحشتك، و الدنيا موحشة بلا بيك.

اما لازمني نبعد ،لازمني نمشي و نخليك ، لازمني نكذب و نقول عمري ما حبيتك و لا كنت ليك ، لازم و مانجمش خاطر نحبك ، نحبك موش نحب بدنك و الا نحب لهوتك بية ،نحبك رغم مساطتك رغم تنرفزني رغم نكرهك و نكره كرهي ليك...و نكره برشا حاجات فيك و نحبهم.
نتمنى جيت نجم نزيد نكرهك و الا نزيد نحبك ،نتمنى جيت نجم نختار يا ابيض يا اكحل ، اما موش بيدي القرار ،الابيض وساخ و الاكحل غدار و انا بين البينين،  و مانجمش نتشكى خاطر قلبي حب هكا   و انت عندك الحق ،اما كيما انت تعلمت ماتعطيش كل شي انا تعلمت مانقبلش باقل ملي نستحق.

و انا #نستحق ، نستحق مانعيشش ضايعة ، نستحق نحب بلا خوف ، نستحق نعيش مع انسان قوى لا يهرب لا من دنيا لا من ظروف ، انسان يحبني كيما انا و مايبدلنيش ، نستحق محبة ساسها صحيح و راجل يشدني و مايسيبنيش و ما يقعدش يدرجح بية ...راجل يقدر الي عشناه الكل ، هو برشا شوية و موش برشا برشا...اما موش بالكمية و موش بالمدة و موش بالكلام ، نستحق راجل يعيشني في الواقع موش في الاحلام ، راجل بية مربوط و محبتوا حديد موش خيوط ، خاطر الخيوط تتقطع بية و نخاف نطيح من السابع سماء بلا جوانح و لا شبكة تلقفني ، و كل مانقرب للارض تتحل عينية من الحلمة و نغزر نلقى تحتي هفهوف و ينفذ رصيدي من الدعاء ، يستجيب ربي لصلاواتي و يرزقك ماخير مني و تتكسر عضامي انا...كان جات عالاعضام ميسالش اما قلبي لا...و اذاكة علاه لازمني نبعد و لازمني نفيق و نتذكر الي موش #لوجيك ...نوخر 10 خطوات لتالي و نخمم بعقلانية و نتذكر كيفاش قبلك كنت و نرجع لخطوتي الاولانية...و نرجع قوية و نقسى و نقلك باي باي ، تصبح على غد اجمل اما اجمل بلاش بية .

#اكرام_سويلم #كلام_الليل