انا و الناس

ما عادش عارفة الصحيح مالغالط ، معادش عارفة اذا الطريق الي اخترتوا و مشيت فيه اخترتوا بكيفي و الا الظروف حطيتني فيه و معاش عارفة نكمل نمشي والا ناقف و الا نرجع منين ما جيت ، نجي نخمم في ظرف قصير كل شي تبدل حتي انا ،خرجت ناس من حياتي و قلت وحدي نكمل وحدي نكون اقوي وحدي نجم نقاوم الدنيا ،قلت ما نربط روحي بحد ،ما نحب حد اكثر من روحي باش ما نتصدم في حد ، باش ما نتجرحش، ،نخرجهم من حياتي خير ما يبعدوا اكيكا ما يوجعني حد و مانقولش يا ليت ،نبعد انا و نقسي علي روحي خير مالي يمشيوا و يخليوني نبكي من قسوتهم علية . انا الي اخترت و انا الي نتحمل مسؤولية اختياراتي ..قيت روحي بعد مدة مانيش متعلقة بحد اكثر مالازم ،كل شي يصير في حدود تخمامي ، الناس الي قعدوا في حياتي كعبتين و كعبة و بعدهم ما يخوفنيش ، في الحقيقة عمري ماكنت نخاف مالبعد الي يخوف موش أنوا الناس تمشي و ما ترجعش الي يخوف انك تقعد وحدك ،الي يخوف انك تتنسي و ما يتذكرك حد موش خاطر ماعندك حد اما خاطر ماقربت لحد لدرجة تخلي فيه شوية من روحك .
كي تعيش بعيد عالناس تتعلم تقيس و تحكر ،تتعلم الي علي قد الحب قد الوجيعة و تتعلم تمشي في الوقت المناسب، في الوقت الي تبدي فيه تتعب..،تتعب مالربطة و الا تتعب مالوجيعة و الا تتعب من انك تسامح و تعدي و الا حتي تتعب من روحك .
زعمة شنوة الصحيح و شنوة الغالط؟ زعمة شنتحاسبوا علي نفسيتنا الي معاش تستوعب وجود ناس اكثر مالازم في حياتنا و الا علي طاقتنا الي استثمرناها في ناس استنزفتنا لدرجة ماخلاوش بلاصة لناس اخرين بعدهم ؟ والا علي فقدان القدرة في الكلام و اللوم و العتاب و التبرير ؟ زعمة احنا صحاح كي نبنيوا حيط بينا بين الي دايرين بينا و الا غالطين ؟

                                                       KOUKOU
                                                  #اكرام_سويلم