لا اعلم ما يصيبني... اهو نوع من الضيق... ام افتقاد لصديق؟
بعد الي عشناه الكل... بعد الدمعة الي رقرقت في عينيك نهار الي قتلك خليني... خليني بعيد و اخطاك من هالبر و معاش تجيني... بعد كلام سوايع عقاب الليل وقت الي عقارب منڤالتي ثقلوا و انا نستنى فيك تسكت و ما تزيدش على ما بية.... بعد الملام و الصياح و الغصة الي في حلقي خنقتني و ضميري بهذل بحالي و بية....بعد العشرة و العمر و الايام الي ضحكنا فيهم من القلب و العينين....بعد الفلس الي غلبناه بركشة عالشط و تبشطيرة سيجاروا بيناتنا الثنين....وقت كنت تتكى على كتفي و نتوسد كتفك و نحكيوا نحكيوا و مايوفى الحديث... و تشهد علينا نجوم السماء و القمرة و نسمة الليل....وقت كنت عليك نتسند كي نميل... و نقوى بيك....و تاقف و تقلي هاني معاك لاخر الدنيا لين يوفى عمرك و عمري.... معاك.... معاك وقت الي كنا صادقين... وقت كلمة اصحاب كانت تغششك و تقلي مانيش كيف الاخرين.... انا وياك اكثر من هكا... اكثر من صحبة و اكثر من عشرة و اطول من عمر.... بعد ما كنت نتفرج في روحي من شبابك عينيك و تخطفني اللمعة....نمسح دمعة و راء دمعة و نلوح وجيعتي وراية... المهم انت معايا.... معايا لاخر الدنيا.
و اه يا دنيا... شعملت فينا بعد هذا الكل؟....علاش تبدلنا و من وقتاش الوقت يغيرنا....و عمرنا ماغدرنا و لا واحد من لاخر تضر.... زعمة عين و صابتنا.... و الا محبة الغير غطات على محبتنا....و الا فرقتنا قضاء و قدر؟.... تي لا عاد موش بعد هذا الكل....يشهد علينا التعب الي مع بعضنا تعبناه و العهد و الوعد و موج البحر.... كي قلنا مايفرقنا شي و مايدوم في الواد كان الحجر....و انت حجر الساس.... و انت الخو و الصاحب و العشير و الناس.... و شحاشتي بالناس ما دامك موجود و مدام الود بيناتنا معقود....في بالي شتكمل معايا لاخر الدنيا.....و تو شغلتك الدنيا؟
نعمبوا الدنيا الي تبعدني عليك....و الوقت الي يخطفك مني.
و ماتقولش موش منك.... منك و مني....و عليك نغني :
كيف تتكــدّر كي الجو في سمـاك يبــدى معكّــــر
وتعيش في الدنيا وتتفكّـــر.... محبّــة وما فيهاش حتى خيانــــة... محال تلقى غير حبّــي انــا.
#اكرام_سويلم #كلام_الليل
Koukou
No comments:
Post a Comment