Thursday, October 3, 2013

خليها بظروفها



علاش ما نعيشوش الدنيا كيما هية بكل لحظة فيها ما غير تخطيط ، ما غير حسابات ..؟
خمم معايا في احلي حاجات صارتلك في حياتك تو تلقي روحك ما خططتلهمش جملا :
ـالحب الي عرفتوا !! خططتلوا ؟؟ حددت فيه الوقت و الساعة و الدقيقة ؟؟ اكيد لا
ـالضحكة الي تخرج مالجواجي !! عملتلها حسابها و مع شكون شتضحكها و لواش؟ اكيد زادة لا


مالا علاش ديما نحسوا رواحنا لازمنا" نپروغراميو " كل شي ، كل خرجة ، كل مقابلة، كل كلمة نقولوها للناس الي قعدة مقابلتنا
نقلكم حاجة !! انا عمري لا خططت الحاجة و صارت كيما نحب عليها بالظبط و علي هذاكة برشا حاجات خيبوي املي فيهم و برشا ناس زادة اما وقت طيشت الاجوندا الي نخطط فيها و الي هية موجودة في الحقيقة في مخ كل واحد فينا صرولي حاجات قد ما تعداو عليهم سنين ما نسيتهمش ، و هكيكا عرفت الي الحاجة  الي ما تحسبلهاش حساب هي اكثر حاجة ما تنسهاش و الدليل الاغلاط الي نعملوهم في حياتنا عمرنا ما قصدناهم و عمرنا ما نسيناهم و لذلك انا قررت اني نحط حياتي الكل في قالب غلطة ههه قصدي معادش نحسبها خاطرني من عند ربي ما نشم مالحساب شي و عمري ما نجحت فيه و زيد كيما تعرفوا الناس الكل الي يحسب وحدوا يفضلوا

خليها بظروفها و تو تشوف الدنيا محلاها ، كي تتوحش حد هز التاليفون و قلوا" نشوفك تو" موش ايا نعملوا پروغرام خرجة ولا حتي هز روحك و امشيلوا قلوا توحشتك ما تخليهاش حتي تخطلها ما تخليهاش في قلبك لنهار البروغرام خاطرها تبرد و تمساط ، و كان ريت محلاه اللقاء بدون موعد خاصة لقاء الاحبة يرد الروح ، خرجة مع اصحابك مالحيط جوها موش كي الايام لخرين فيها بلادة اكثر و ضحك اكثر و الدوزة فيها تعلي ...يزيو ما خططتوا ، اسمعوني انا ما قلتش ما تخطوا لشي خاطر فما حاجات لازمهم الحسبة اما ما
تخطوش لكل شي فما حاجات مطعمهم احلي علي غفلة .

http://www.youtube.com/watch?v=fEF5KAya3dI  نخليكم مع هاذي

KOUKOU

No comments:

Post a Comment